መንግሥቴ ሆይ ማን ቢሉህ ማንን ታውቃለህ

በሊቢያ የተከሰተውን ዘግናኝ ፣ አናዳጅ ፣ አሳዛኝ ፣ አበሳጭ ፣ አቃጣይ ፣ አስለቃሽ ፣ ጥርስ አስነካሽ ፣ አብከንካኝ ፣ እና ባለ ብዙ ስሜት ባለቤት ኢ-ሰዋዊ ወይም ኢ-ሰብአዊ ግድያ ተከትሎ ፣ ጸሓዩ መንግስታችን አንድ ሁለት ጥያቄዎችን እንዳቀረበ ሰማሁ ።

1) ኢትዮጵያዊ መሆናቸው ይጣራለት ዘንድ
2) የተለቀቀው የድህረ ገጽ የምስል አሸንዳ ( ) እውነተኝነት ተጣርቶ ይቀርብለት ዘንድም


የኛ ጥያቄ መንግስታችን ሆይ ማን ቢሉህ ማንን ታውቃለህ ? እነ ባልቻን ታውቃቸዋለህ ወይ ? እነ እያሱ ትንሽ ትንሽም ቢሆን ትዝ ይሉሃል ወይ ? እነ ዔፍሬም ፣ እነ ዓለም ፣ እነ አከሌ ፣ እነ አከሌን ታውቃቸዋለህ ወይ ?
የኛ ጥያቄ ኢትዮጵያውያኖች ሆነን ብንገኝ ፋይዳ ያለው ነገር ታደርጋለህ ወይ ? ወይስ ይቺን አጋጣሚ ተጠቅመህ የኢትዮጵያ ሙስሊሞችን ከ አይሲስ ጋ አቆራኝተህ ፣ ውሻ በቀደደው እንዲሉ ጥናታዊ ፊልም ሰርተህ ታቀርብልን ይሆን ?
እርግጥ ነው እንደ አንተ አይነት በውሸት መረጃና ማስረጃ ዜጎቹን እየከሰሰ ማሰር ፣ መግደል ፣ ማዋረድ ለለመደ፣ ዱርዬ እና ዱር አደር ስርዓት ፣ የሚያዩትን ሁሉ አለማመን ፣ ዓለም የመሰከረውን ፣ ኢትዮጵያዊው ደማችን ታርዶ የተናገረውን ፣ ጥቁር ቆዳችን በርሃ ላይ በባዶ እግሩ ተገፍቶ ፣ አንገቱን ወደ መሬት ቀብሮ ተስፋ ከቆረጡ አይኖች በሚወረወሩ ቃላቶች አሸዋ ላይ የጻፈውን ፣ ይቺ ቀን ታልፍ ዘንድ በጭንቀት አምላኩን በልቡ ሲለምን የሚያስይ ፣ በተንቀሳቃሽ ምስል አሸነዳ የቀረበ ማስረጃ ይረጋገጥ ማለትህ ፣ የዓለም የዜና አውታሮች ስለኛ ማንነት ያመኑትን አለማመንህ ፣ የገባህበትን የውሸት ማጥ ፣ የኖርክበትን የሐሰት ሕይወት ፣ ለኢትዮጵያዊነት ያለህን ንቀት ፣ ለሕዝቦቿ ያለህን መራር ጥላቻ ማሳያ ነው ።

ቆይ ግን ማን ቢሉህ ማንን ታውቃለህ ? እነ ባልቻ እኮ በምርጫ 97 አንተን መራሩን ስርዓት ተቃውመው ሰልፍ የወጡ ልጆች ነበሩ ፣ ያልፈለጉህ ፣ ካንተ ጋ ምንም አንዳች የሚያመሳስል ነገር ያልነበራቸው ፣ በደልህ የሰለቻቸው ፣ ፍትህ የናፈቃቸው ፣ የወጣትነት ጉልበታቸውን ፣ ዘረኛ ስርዓት ሽባ ያደረገባቸው ፣ ሃገራዊ ፍቅራቸውን ፣ ጉልበተኛ መንግስት የነጠቃቸው ። እነ ባልቻ ለምን እንደታረዱ ታውቅ ይሆን ? አዎ በሀገራቸው ሰብአዊ ክብራቸው ሲገሰስ ፣ የመኖር ሕልውናቸው ጥያቄ ውስጥ ሲወድቅ ፣ ጉርሻ የሚሸጥበት ፣ ልጃ-ገረዶች ጭናቸውን አጥበው ለወሲብ እርድ የሚቀርቡባት ፣ ህጻናት ለባእዳን በጉዲፈቻ የሚሰጡባት ፣ ግብረ ሶዶማዊነት ገሃድ የወጣ እውነት የሆነበት ሀገር ኗሪ ልጆች በመሆናቸው ፣ ነገሩ ሁሉ ህሊናቸውን ቢያመው ፣ የነብሳቸውን ቅኔ ሰም ቢያደርገው ፣ ይበሉት ቢያጡ ፣ የሚቆጡት ስርዓት ፣ የሚያኮርፉበት አባት ፣ የሚመኩበት ወገን ቢያጡ ፣ ይሄን ቢያጡ ነው ከሀገር የወጡት ። እንደ ሰይጣን ግብር ንጹህ ደማቸው ባህር ላይ የፈሰሰው ለምን ይመስልሃል ? በየመን እቶን እሳት መጋፊያ የሆኑት ለምን ይመስልሃል ፣ በሳውዝ አፍሪካ ገላቸው መጥረቢያ እስክያደንዝ የተቆራረጡት ለምን ይመስልሃል ፣ እንደ እንኩሮ በእሳት የተቆሉት ለምን ይመስልሃል ፣ የባህር ውሃ በየ ቀኑ የሚበላቸው ለምን ይመስልሃል ? ስላደግን ? ስለተመነደግን ? ቀለበት መነገድ ስለሰራን ? ችግን ስላፈላን ? ይልቅ መንገድ የገነባው መናገር የማይፈቅድ ስርዓት ፣ ባቡር እና ግድብ የሰራው ፣ ዜጎች በእኩልነት መኖር የማይችሉበት መንግስት ፣ ይሄ አደገች ፣ እዚህ ደረሰች ፣ ይህንን ሆነች እያልክ የምታወራላት ሀገር ፣ ከልመና እና ከምጽዋት ሳትወጣ ፣ ልጆቿን በቀን አንዴ እንኳ መመገብ ቢያቅታት ፣ ነው እነ ባልቻ የታረዱት ፣ ደማቸው ደመ ከልብ ሆኖ የቀረው ለምን ይመስልሃል ?

አዎ ማን ቢሉህ ማንን ታውቃለህ ? ይልቅ እንደለመድከው ሆድ አደር ከያኒያን ሰብስበህ ፣ በየ ታንኩ ላይ ተንጠልጥለው ፎቶ ሲነሱ የሚያሳይ ምስል ልቀቅና ይህን ደራሽ ያጣ ሕዝብ አስፈራራበት ። ያንተ ታንክ ፣ መትረየስ ፣ የጦር ጀት የገዛ ህዝብህን ለማስፈራራት እንጂ ፣ ወገኖች
ሲዋረዱ ና ሲታረዱ ፣ የታንክህ ድምጽ ፣ የጦር ጀትህ አፍንጫ የሊቢያ ሰማዮችን ሰንጥቆ እንደማያልፍ እናውቃለን ። ስለዚህ እነማን ናቸው ? ምንድን ናቸው ፣ ይጣራ ፣ ወዘተ ወዘተ አትበለን ። ማን ቢሉህ ማንን ታውቃለህ ! እንኳን የገደልከውን ፣ ያስራብከውን ፣ ባንተ ምሬት ከሀገር እንዲወጣ ያደረከውን ፣ በየ እስር ቤቱ ያጎርከውን ፣ የራስህንም ኢትዮጵያዊነት አታውቅም ! ዝም በል !

ዝም በል አንተ ጭንጋፍ ዘረኛ
ተወን አንተ መርዘኛ ዳተኛ
የኛ ማንነት ፣ አይጣራም ባንተ እውነት
የኛ ደም የፈሰሰው
ዛሬም ነገም ባንተ ነው !
ዝለዚህ ዝም በል !
ቢያንስ ሞታችንን መነገጃ አታድርገው
ተው !
አንተ ርካሽ ጥንብ አንሳ
አንተ የሰይጣን ጎረምሳ
ዝም በል ተወን
እንሙት
ዝም በል ፣ አንተ ዲያብሎስ
አናቴ ከይሲ አንተ እርኩስ
አንተ ጊንጥ መርዛም ተናካሽ
ዝም በል ፣ ሽሽሽ !
ዝም በል ፣ ዝም በል ፣ ዝም በል !

ወይ ነዶ !

ሄኖክ የሺጥላ